郭羨妮後悔露一線

我入行後負面新聞都唔算多，不過有好幾次都係畀傳媒「屈」，好多次令我想放棄，心諗點解佢哋要寫到我咁衰？我又唔係欠佢哋，好唔值！我咁辛苦工作，換來嘅居然係呢啲新聞，好唔開心，不過過咗一段時間會同自己講，我為咗咁樣唔做咪輸咗畀佢哋？我走咗去咪認輸？我要喺邊度跌低，就喺邊度起番身。

否認隨地解決

好多時，狗仔隊嘅跟蹤其實係幾困擾，就算我去超級巿場買嘢，佢哋都係咁影，都幾滋擾。影咗相返去，佢哋又一定唔會寫好嘢，真係好抗拒，好唔鍾意。所以平時冇嘢做，我情願匿埋喺屋企。其實都要多謝家人、朋友及fans支持我，令我可以撐得住。

以前有單新聞，啲雜誌寫我返大陸拍劇集《爭霸》時，隨處「解決」，呢個對女仔嚟講真係好侮辱、好離譜！當時自己真係有口難言，有腦嘅會覺得梗係冇可能，不過真係有啲人覺得報道係真，覺得我係咁，諗吓一個明星點有可能周圍屙？仲係一個女仔！嗰次對我嚟講真係一個屈辱。有同事力撐我，不過自己好唔開心，嗰陣好慘，我去廁所，都會畀人跟入去影，真係有陰影，但我從冇鬧過佢哋，我忍得到，嗰種冇安全感嘅感覺真係好難受。

老公冇禁性感

講到08年台慶性感事件，真係無意之中發生嘅事。嗰陣拍劇拍到好忙，一去試衫就試咗五、六件，覺得啱身咪着囉！當時有經理人同我一齊揀衫，開show之前我着咗條裙出嚟，個個見到都「嘩」一聲！睇咗相先知咁犀利。不過以後都唔會有呢啲情況發生，唔係老公唔畀我性感，而係我自己唔想囉！

口述：郭羨妮 筆錄：影視組