泳兒獲真情表白受寵落淚
歌手泳兒（Vincy）承認與髮型師男友Ziv拍拖後，首次深入剖白二人戀情。原來泳兒男友是一名喜愛打籃球的「陽光怕醜仔」，身高六呎的他由於太害羞，所以鼓起勇氣向泳兒表白時，直令她流出「快樂眼淚」，教入行六年、情路平淡的泳兒感到非常幸福。
泳兒近日推出大碟《快樂眼淚》，當中同名作品的意思是女生太受感動時，會流出非常感動的眼淚，Vincy說：「女仔係用水造，成日喊，但係流眼淚會有唔同原因，唔開心啦、感動啦、太開心啦！（你依家拍拖係咪好開心？）兩個人一齊係一種緣分，茫茫人海入面可以夾得到，而對方又做咗啲嘢令你覺得自己好得寵，咁就會好感動。（你男友做咗啲咩令你覺得受重視？）佢係一個好怕醜、好收埋自己情感嘅男仔，所以佢向我表白嗰時，係鼓咗幾大勇氣，令我好感動。」
泳兒說：「佢係一個大細路，鍾意打波，好好動，我就靜態啲，所以我哋一凹一凸，都算幾夾！」另外，泳兒自爆近日積極轉look，希望給fans一個更「女仔」、更清新的感覺，但新歌MV中亦想表現得更「型格」。
充滿正能量
Vincy新碟當中最後一首歌《Move On》的曲詞都是出自她的手筆，該曲主題是失意時不要忘記疼錫自己、支持自己的人，做人要正面應付問題，問男友是否很支持她？她說：「佢係一個好有正能量嘅人，好支持我。其實除咗佢，我都會打畀身邊嘅朋友，抒發感情。」而新碟另一首主打歌《就手》，則是講拍拖的情侶，男方當女方是便利店，要她隨傳隨到，Vincy表示從未遇過這樣的人，而她亦會給予男友空間，不會管他太緊。
文：王羽飛