陳慧琳夠聽話孖克勤出騷
無綫與四大唱片版稅風波成功破冰後，據悉無綫會讓聽教聽話的歌手陸續「解凍」。繼李克勤日前破禁亮相無綫後，據悉陳慧琳亦於明年初「復出」無綫；反觀陳奕迅和謝安琪等歌手，則因為在冰封期曾寸爆無綫，故要繼續做「冰人」！
無綫和四大唱片擾攘近兩年的版稅風波，早前破冰成功。據悉離巢在即的無綫總經理陳志雲，一直對破冰事宜出心出力，擔當說客角色，望盡最大努力積極斡旋。與無綫關係友好的李克勤，向來「效忠」無綫，早前克勤破禁成功，歷史性亮相《歡樂滿東華2011》，雖然節目為慈善性質，但令雙方關係邁進一大步。
據知向來賣口乖的陳慧琳（Kelly），將繼克勤之後，成為第二位亮相無綫的四大歌手，Kelly明年1月聯同克勤擔任《2012國際中華小姐競選》表演嘉賓，屆時Kelly將會腹大便便返娘家，飲得杯落！不過有人歡喜有人愁，曾於「冰封期」寸爆無綫的陳奕迅、謝安琪和張敬軒等，則繼續冇面畀，依然要在雪櫃做「冰人」！
志雲密會黃劍濤
另外，昨午1時，本報發現環球高層黃劍濤和陳總，現身尖沙咀某酒店內的西餐廳用膳，並刻意挑選暗角位置密密斟。現場所見，兩人密斟時笑容滿面，似為商討事宜獲得共識。記者上前向他們打招呼，兩人表現愕然，問到是否傾談大計？黃劍濤說：「傾私人嘢，同工作冇關。」記者笑指可會力邀陳總過檔？黃笑說：「點會呢？請唔起，如果請到就好。」再追問是否談破冰大計？陳總說：「破咗啦！」黃劍濤再三強調純私人聚餐，不涉及公事。
採：影視組
文：專案組