杏兒默默做戲感動你

胡杏兒入行12年終於獲封視后,她坦言從《流金歲月》中演弱智女孩而被評為「胡囧囧」不懂演戲,到增肥至152磅演《肥田囍事》,卻在頒獎禮上食白果,曾令她陷入事業低潮,但她沒有被打沉,選擇默默做好自己,相信憑演技終有一日感動觀眾。

我今年憑《萬凰之王》中的奸角而登上視后寶座,回看風高浪急的演藝生涯,我覺得演員係被動,只要盡力做好個角色,雖然我知道自己有『胡囧囧』呢個花名(02年杏兒在《流金歲月》飾弱智女孩,被評為不懂演戲,並給她這花名),但我承受到呢個批評。唔放你在眼內都唔批評你!所以我只有默默做好自己,希望總有一日贏得感動。

增肥不為爭獎

當年演《肥田》時增肥,可謂一項創舉,全香港嘅人都睇住我點增肥,呢個壓力係最大。當年我拍呢個劇,絕對唔係為爭獎,事實上,當年我都覺自己演技未夠好,未Ready,點都贏唔到同年角逐視后嘅阿佘(佘詩曼)我知自己一定輸!結果,我當年食白果。

失意頒獎禮,令我重新檢視自己,當年我唔開心唔係因為冇獎,而係覺得自己係咪差成咁?嗰時真係一下子被打沉,點畀心機都突破唔到,好似去到一個樽頸位,有一刻真係諗過放棄!好彩都係一刻啫!好快就閃過咗,因為我鍾意呢行,最後我都冇離開,繼續我呢條演藝之路!

幸遇上好劇本

榮封視后,我覺得歸功於遇上好劇本,攞獎固然開心,講到吐氣揚眉又冇咁犀利!我只係覺得自己今年好好運,遇到幾個好嘅劇本,好似《魚躍在花見》、《怒火街頭》及《萬凰之王》,令到我嘅信心返番嚟!

口述:胡杏兒 筆錄:影視組