同行拍拖有「着數」
一段感情要維繫，其實好難，如果大家都係娛樂圈嘅人就更加難，不過，我就覺得總有方法，因為愛情就如同一棵植物咁去栽種，有時你淋吓水，有時我又放吓肥料，兩個人同一目標同一諗法就會長久。
其實我同Bosco大家都係演員，同行對互相了解會有幫助，起碼知道真係會咁夜收工；而且大家都係演員，可以分享演戲工作嘅所有事，視對方為良性競爭對手，見佢事業發展得好時，我又會努力啲、再做好啲！即使見Bosco演戲接觸唔同異性對手拍親熱戲，我亦唔會呷醋，因為我知發生咩事，換轉係我，我都從來冇諗歪過，因為如果我唔能夠抽身，就代表我唔夠專業，不過當真正演出時，我梗係會投入當對手係男友，但導演嗌cut就抽離，我好理智！
其實我之前都有個拍咗4年拖嘅男友（IT才俊Nardone Rhggero），佢後來娶咗鍾麗淇，佢哋好襯，依家都好幸福。呢個男仔係一個好好嘅男仔，亦係一個好老公嘅材料，當年自己因為太忙keep唔到，都好唔捨得。