黃宗澤：佢做戲唔係好妥
身為杏兒男友，身份終被認定，當然很開心，黃宗澤坦言被女友當晚「愛的宣言」嚇窒：「事前真係唔知佢會講埋啲咁嘅嘢，我都畀佢嚇窒！不過見佢攞獎都好戥佢開心，但講到被催婚，大家都未有計劃，（七年之癢？）杏兒幫我搔咗咪唔癢囉！我哋大家都鍾意呢行，拍吓戲先啦！」
自認軟皮蛇
對於被爆難頂，宗澤亦不甘示弱指杏兒性格太負能量：「佢啲負能量太強嘞！打死人咩！呢樣係我覺得佢難頂嘅地方，有時見佢做戲唔係好妥，都會話佢，咁佢唔開心咪又嬲囉！（視后演戲都有唔妥？）唔知佢係咪睇得周星馳啲戲太多，有時做戲嘅反應係要人性化，但佢唔夠囉！都係一種提醒啫！我覺得話得佢啱我就唔會氹番佢，我呢啲可能叫『軟皮蛇』，佢發脾氣咪由佢發，要嬲咪由佢嬲！所以咪話我難頂囉！」