杏兒：身邊有佢……真係好幸福
捱了12年終在本月初當上視后的胡杏兒，期間得到黃宗澤（Bosco）愛的扶持，與她度過事業低潮期。一向不肯親口承認戀情的杏兒，終在頒獎禮上封后後，向「背後的男人」Bosco宣讀「愛的宣言」，一句「我知我難頂，但你都好難頂，希望我哋一路頂住大家」，令全場起哄叫兩人結婚，惟剛摘后的杏兒事業心重，理性地表示得獎與結婚屬兩回事，暫拒成婚。要知杏兒親述難頂事？Bosco如何將她俘虜？杏兒將在本報一連五日逐一細訴愛情、事業、姊妹情和求學時當「校花」等鮮為人知的故事。
我得獎當然好開心，但就有好多人叫我哋結婚，我覺得結婚同得獎係兩樣嘢，我啱啱先攞到個獎，等我演吓戲先啦，相信我啲fans見我攞獎已夠開心，未使要我結埋婚囉！因為咁快結，我就要做媽媽角色，我仲想同好多好戲之人合作，好似雯女鄧萃雯呀……所以，結婚係人生大事，都係慢慢先啦！
多愁善感情緒化
講完唔結婚，又會有好多人問我，究竟我講我哋之間嘅「難頂嘢」係乜？其實都係自己啲多愁善感嘅性格，我係悲觀主義者，做所有事或對別人嘅說話都比較認真，為人又情緒化咁啦……我知係難頂，但做演員係要多愁善感先得架！因為演員本身都係shot shot哋！至於佢（Bosco）有乜嘢難頂，我就唔想講人哋唔好嘅嘢！等佢自己講啦！
被對方開心感染
唯一爆過Bosco唔好嘅嘢都係脷短啫！其實男仔脷短唔緊要，有其他長處咪得囉！Bosco為人樂觀，識得跟人相處，可以令周圍人開心，令人覺得佢好friendly，演戲又好，工作一路都好努力，佢個樣雖然畀人覺得係唔努力嘅人，但其實係相反！加上佢都仲有好多優點，我哋夾到，都係因為佢嘅開心可以感染到我，我悲觀、佢開朗，咁咪一凹一凸，大家相處可以平衡番，咁就唔使「夾死烏蠅」！
爆Bosco好廚藝
除咗開心嘅性格，Bosco仲有撒手鐧，就係廚藝了得，佢煮嘢好叻，整意粉呢啲已經好小事，佢就算煮罐頭湯都話要加配料，就連油鹽水蜆都難佢唔到！因為佢細個時喺大牌檔學過，相對我就好皮毛，所以煮嘢食呢家，我永遠入唔到佢個廚房，有時都覺得自己好冇用，見到佢咁拿手，我都好冇癮，喺廚房門口退後行番出去。不過，話就話冇癮，但身邊有個咁嘅人，又真係好幸福嘅！
口述：胡杏兒 筆錄：影視組 攝影：林蔚恩