羽翹拒做師奶 潮玩走婚
模特兒莊思敏剛與吳浩康分手，早前與好友羽翹一同分享愛情經歷。原來兩女在愛情路上均為烈女，羽翹更有一套愛情新體驗，就是「走婚」，她指將來結婚後與老公分開住，維持婚前的私人空間；而莊思敏的戀愛宗旨是愛得無悔，唔啱就放低。
莊：莊思敏 羽：羽翹
要男友交代行蹤
莊：你會唔會同圈中人拍拖？
羽：啱啱入行覺得唔會，但依家會有保留，最理想就係同幕後嘅人拍拖。
莊：我覺得幕前幕後都冇所謂，但對方一定要理解我嘅工作，要好明白我嘅工作環境。
羽：不過做幕前會有好多人鍾意，我會冇安全感。
莊：做幕前唔紅就慘啦，兩個人一齊要起碼有七成信任，做得呢行，要靠大家付出，多啲搵對方，不過坦白講，做呢行嘅人，好多都唔嗲唔吊，唔鍾意承諾。
羽：咁又係，睇番自己都唔會約實人，因為自己都唔清楚個時間表。
莊：我好憎人放飛機，但會視乎係咩原因，如果係有啲人慣性冇交帶，我唔會接受。
羽：我幾緊張男朋友出去轉場要話畀我聽，要交代行蹤，我覺得呢個係一個尊重，呢行咁忙，如果有空檔都應該盡量打畀對方，大家了解吓對方做緊乜，都係一種關心！
莊：我係一定要講，小事都可以算，試過對方臨時要飛，去到機場先同我講，接受唔到，但我盡量唔會破口大罵，會採取黑面。
羽：我會做番佢做嘅事，例如佢成日唔覆我電話，我都唔會覆佢，到佢話我時就話你都係咁啦，以其人之道，還治其人之身。
失戀切忌搵人攝
莊：你覺得自己黐唔黐身？
羽：我係一個好黐身嘅女朋友。
莊：我都係，所以我唔會畀自己咁得閒，會搵好多嘢畀自己做。
羽：愛情對我嚟講好重要，有時大家有問題會影響工作情緒。
莊：愛情係心靈上嘅一個支撐同慰藉，我一拍拖就好信對方，但好多時都因為太信任而失望，到最後會對對方人格幻滅。一段關係結束我會先反省，係咪自己做得唔夠好。失戀會令人失魂落魄，但切忌胡亂搵個男人嚟填補時間，因為通常之後會極度後悔。
羽：失戀仲有一樣嘢好緊要，就係唔好畀自己醜樣，要keep住扮靚。
莊：細個失戀三日唔出房門，匿喺間房煲劇，失戀睇碟都係一個好好嘅治療方法，一般去到最頹廢嘅時候就會突然叮一聲，覺得唔可以再咁樣落去。總之每段關係都盡最大努力，兩個人一齊感覺好重要，反而條件都係其次，如果一路落去感覺都係啱，自自然會諗結婚。
羽：我細個覺得自己廿幾歲就結婚，但依家自己都26歲，慢慢發現兩個人發展相處係需要時間。
曖昧時期最開心
莊：係咪呢行嘅人就唔一定會諗結婚呢？想生BB先會諗結婚，其實我都唔排除會閃電結婚。
羽：我上網睇過依家好流行「走婚」，即係結咗婚之後都分開住，有啲女人唔想咁快做師奶，但又覺得一張婚書好重要，就係咁樣提出。
莊：我又唔贊同，結婚係共同生活，想一生一世先會結婚。一個合適嘅結婚對象最重要係心靈交流同溝通。兩個人一齊最初曖昧嘅時候就最開心，大家都會將缺點勁隱瞞，亦唔會對對方有要求。
羽：我都好認同，好多人得到手就不外如是，差好遠。女仔同你曖昧一段時間之後就想關係變得實在，呢個時候如果個男仔唔係認真，就會唔肯確認你嘅地位。
莊：愛情係一門終生嘅學問，冇一條方程式係一定work，或者一定唔work，總之我嘅戀愛宗旨就係要愛得無悔，覺得大家唔適合時就算幾唔捨得都要放低，唔好畀唔甘心害你一世。
羽：講得老土啲，有啲嘢係你就係你，冇得強求。要學懂珍惜，同埋包容，要記得永遠留幾分空間畀大家，咁樣兩個人相處先會舒服，至於結婚？緣分要嚟，自然會發生。
採訪：Ada Lam
攝影：司徒國榮
服裝：Ted Baker（莊思敏）
化妝：Lisa C.（羽翹）
髮型：Jay Yeung@hair corner（羽翹）