MC Jin谷底反彈學懂感恩
饒舌歌手歐陽靖（MC Jin）自08年由美國回流香港發展後，憑鮮明音樂風格和多變形象工作不斷。他年初跟圈外女友結婚，剛剛獲得TVB頒發「飛躍進步男藝員」，本月中更將舉行首個個人賣票音樂會，表面看似一帆風順，實情是經過一段不為人知的谷底期。
在美國出生長大的MC Jin自小接觸Hip Hop文化，19歲參加比賽Rap贏黑人一戰成名，更獲大型Hip Hop廠牌招攬旗下，以為可以有一番作為，可惜自首張專輯在當地推出後反應一般：「開頭順景時，雖然未至於囂張，但點都會有飄飄然嘅感覺，但事業升得快跌得仲快，自己初時都接受唔到，淨係識匿喺屋企Hea，直到08年把心一橫返香港碰吓運氣。」
舉行首個個唱
明顯地MC Jin這一注是押對了，來港4年推出的兩張專輯反應理想，並終於有機會在本月16日舉行首個個人演唱會《In My Dream，紅館見》，但演出地點卻在九展：「個名其實係有啲玩嘢，概念來自紅館係所有歌手嘅目標，我只係一步步咁向前行，不論最後我喺紅館開唔開得成，過程都足夠我去enjoy。」
2011是豐收年
憑音樂上Rap出條血路的MC Jin，近年更殺入電視圈，有機會主持及演出多個節目和劇集，並在台慶頒獎禮一舉奪得「飛躍進步男藝員」，他自言2011年絕對是豐收年。但成功背後MC Jin不忘遠在美國的太太Carol：「我同佢識咗好耐，佢睇住我經歷事業嘅高低，即使喺低潮時我心情差，成日發脾氣，佢都對我不離不棄，娶到佢我真係好感恩。」
支持他走出事業谷底的，MC Jin透露除了太太外還有虔誠的信仰：「有咗信仰之後，睇事物角度唔同咗，開始凡事懂得感恩，每樣工作都會視為人哋畀機會你，要用心去做好，就好似今次演唱會咁，希望觀眾會覺得畀錢買飛嚟睇係值得。」
文：曹家誠