糖妹人矮志氣高
樂隊糖兄妹成員黃山怡（糖妹），雖然人仔細細五呎唔夠，但勝在樣子甜美，形象討好，火速成為宅男女神。擁有甜美聲線的她不甘僅在樂壇發展，誓要踩過界做個全能藝人。性格樂天的她亦不會因身材矮小而感自卑，反而當作個人標記攻陷宅男市場！
事業篇：
我認同「人矮志更高」呢個道理，我確係高度不足！但矮唔係罪，矮有矮嘅好處，而且我志向宏遠，做歌手只係短短年幾時間，仍然有好多進步空間，無論喺歌藝或者創作上都要Keep住成長。就算叫我跳舞都冇問題，都係一種表演方式。
講番今年成績，我同糖兄都好滿意，因為去咗好多地方宣傳，我亦喺內地拍廣告，今年收入唔錯，確係意料之外。嚟緊Boxing Day仲舉行售票音樂會，心情興奮又緊張，最近埋頭苦幹綵排。
不怕與樂瞳比較
入行呢年幾以來，最多人談論係話我聲線或外形都似足陳慧嫻。雖然我仲未同佢親身接觸或者直接對話，但原來有人喺慧嫻面前提過我。佢話知道我係邊個，我已經開心到瞓唔着。我唔擔心畀人話有慧嫻影子，或者被叫「翻版陳慧嫻」，可能我EQ高，我又冇乜所謂。其實咁咪仲好，起碼有話題！
除咗話我似慧嫻外，外界都鍾意將我同樂瞳比較。雖然大家都係宅男女神，但我唔怕比較，因為我同樂瞳嘅風格及路線都唔同，大家各有支持者，亦冇因為比較而影響大家感情。其實自己今年唔算多負面新聞，傳媒朋友都好愛錫我，我已經好感恩。
會唔會由幕前轉番幕後？冇所謂嘅，但依家同公司有約。好多人認為歌手應該專心做音樂，若然拍戲或者上遊戲節目，就好易畀人話等同妥協、唔夠堅持，我唔認同o架！做藝人應該百足咁多爪，唔應該有太多局限，當然作為歌手，出碟及唱歌係大前提，但可以嘗試其他工作。
愛情篇：
今年事業方面算順利，不過感情方面仍然交白卷！之前傳我同Dominic（Bro5成員），甚至傳我結婚，但全部都係流料，我真係冇拍拖！我都想問點解，亦唔知邊方面要檢討！可能我太man啩？其實我一啲都唔cute，反而好多朋友都話想「兜巴星」我喎，哈哈﹗
經常主動追男仔
講番擇偶條件，咁耐以嚟都冇變，陽光大隻仔始終係首選，呢期柯震東就正到爆！我拍過四、五次拖，通常係我主動追男仔。有冇慘痛經歷？咁又冇，但試過畀前度背叛囉！佢同我拍緊拖，但個心原來仲有另一個人！當時我嬲到發火，仲嬲到喊，可能同我注重感情及重情義嘅性格有關。
有冇試過畀女生追求？都有嘅，講真將來遇到一個啱嘅女仔，就要睇緣分，我本身唔介意亦唔排除同女仔拍拖談戀愛。
性格篇：
我嘅性格直腸直肚，唔太鍾意social，有嗰句講嗰句，我又唔會覺得好蝕底。可能同星座有關，本身屬天秤座，個人比較和善和諧，做嘢亦甚少發火。
入行前後性格有冇分別？基本上冇乜，同以前班知己朋友仍然有聯絡，大家友情冇變，我依舊係以前嘅糖妹。每逢大時大節，我會逐個SMS畀朋友，唔同朋友有唔同message，同埋我鍾意約出嚟聚會多過喺facebook或者blog傾偈。若然要講好大改變，就係愈來愈慳家。
採訪：戶冊平 攝影：秦健輝