榮文蔚約大隻男禦寒滾一滾

打邊爐向來是冬天好節目，日前名媛榮文蔚被發現出現在灣仔火鍋名店，身邊更有名大隻男性好友，兩人為方便睇電視，唔嫌逼坐在卡座同一邊，二人不時望着電視指指點點，一餐飯食足兩個多鐘，直至深夜十二時始埋單離開，當時枱面仍剩有大量食物，榮文蔚雖貴為名媛，但未有隨便浪費食物，叫侍應打包兩大盒帶走。

飽餐一頓，兩人散步往銅鑼灣，沿途不時交頭傾談，表現得相當熟落。及至經過影碟舖，榮文蔚突然一支箭衝入店內，甚有興致埋首揀碟，並且一度懶理儀態蹲下身逐隻慢慢睇，期間兩人不時交換意見，最後成功挑得心儀影片雙雙離開。

榮文蔚與大隻男好友開餐同坐一卡座，方便睇電視。

飽到打包離開，榮文蔚和好友密密傾由灣仔行落銅鑼灣。

Keep fit有道

雖然距離一餐豐富火鍋未夠半小時，榮文蔚看見舖外一檔香噴噴的雞蛋仔小店，馬上又口痕痕，立即拿出銀包買下一袋，一於將雞蛋仔作甜品，然後兩人齊齊乘的士離開。剛剛一餐飽到食不下，未幾又品嘗小吃，看來榮文蔚必定有獨門keep fit秘方，才能保持多年體態不變。

文、攝：追蹤組