阿叻吼實坐陳總個位

志雲離職惹來全城熱話，其職位花落誰家，相信外界非常關心。與無綫股東陳國強老友鬼鬼的阿叻，笑言夠資格擔任陳總一職。他說：「其實ＴＶＢ邊個睇都得，真係搵我，我即坐，一人之下，萬人之上，求之不得。（入去要幫手救亡？）唔使呀？ＴＶＢ四十幾年來冇輸過，講真，搵我除咗我都姓陳，真係睇唔到有咩理由。用賽馬比喻，就係99.99個巴仙唔會由我跑出，叫其他人做啦！我始終係藝人，只有志雲一個可以又幕前又幕後。」

實踐遊學計劃

志雲昨早9時30分在外事部副總監曾醒明陪同下見傳媒，他說：「離職計劃已有一段時間，我想心無旁貸（正確為心無旁鶩），學習新事物，想實踐遊學計劃。（四月離職？）日子仲磋商緊，無綫准我休假。我會趁呢段時間去美國硅谷、拉斯維加斯訪問、參觀、交流。（準備自組公司？）冇呢個計劃，但一直有其他機構向我招手，不過若我要重返電視圈，ＴＶＢ係首選平台。（離職同梁乃鵬出任主席有關？）完全冇關，梁博士係好領導，成績有目共睹，（同捲入貪污案有關？）完全冇關，係兩件事。」

曾醒明陪志雲會見記者時有講有笑。

阿叻（左）與無綫股東陳國強分屬好友。（資料圖片）

將於明年一月一日接替邵逸夫出任電視廣播主席的梁乃鵬透露，志雲離職是昨早才落實：「一直有留佢（志雲），尋日（前日）都仲留緊，係今早（昨早）至落實。方逸華小姐都有留佢，我都好唔捨得。但讀書係佢理想，或者因緣到，佢會返ＴＶＢ呢！（唔驚被人撬？）百分百保證佢唔會去第二度。（佢應承你？）呢個好放心，絕對唔會呀！佢亦都唔係四月走，大家都好客氣尊重，所以唔會四月咁快走。（搵唔到人選接任？）呢個世界冇話冇咗邊個唔得，冇咗我都得呀！（出面搵人定內部提升？）言之太早啦！」

梁乃鵬強調志雲不會過檔其他電視台。

樂易玲指無綫沒有因志雲離職而影響士氣。

樂易玲嘆可惜

盛傳與志雲不和的製作資源部總監樂易玲說：「陳總係我直屬上司，出咗名係大師，個個有事都搵佢請教。可能佢去遊學行開吓，佢離職對公司同我哋係可惜，我會返公司了解。有高層走，更高層一定有安排，陳總離職係遺憾，但梁主席話我哋係善戰勇士，唔會為小事氣餒。」

志雲昨晚7時40分下班，沒有回答記者問題，登上七人車直駛銅鑼灣富豪酒店。此外，無綫金牌監製劉家豪及梅小青，早於九月已向無綫請辭，明年三月將夫妻檔過檔now。文：影視組