徐子淇老公怕嘈 接令避孕
千億新抱徐子淇已是三子之母，近日她出席活動時明顯肚凸凸，再度有孕味，不過子淇表示因為老公怕嘈，現已實行「唔要懷孕要避孕」，但若有意外驚喜則當別論。
徐子淇昨晚以一身鮮紅色裙出席「12月當代視覺藝術展開幕典禮及晚宴」活動，記者甫見她現身即時追問是否又要恭喜她？她聽罷笑說：「我都唔知點解愈嚟愈瘦，但個肚就愈嚟愈大？不過我覺得唔係囉，可能係上星期生日食得多咗。」
囡囡會呷醋
徐子淇坦言未有檢查，她說：「冇check喎，因為我驚如果真係嘅話會接受唔到，依家個時間表已經好滿，我試過帶三個仔女出街，點知帶漏咗中間嗰個，要翻轉頭湊番佢，三個已經係最多，我都驚中間個女會呷醋，所以都要花多啲時間畀佢。」
子淇表示老公李家誠也不想再要小朋友，因為覺得家中很嘈吵，又投訴少了二人世界。問到是否要避孕？她說：「唔要懷孕要避孕，其實我自己就好想生，老爺、老公同我之中我就最鍾意生，但有意外驚喜就唔同。」她更推翻之前「30歲前要生五個」的言論。
生日收畫作
談到生日老公送了甚麼禮物給她？她透露老公送了中國畫家畫作給她，又謂老公愛送有關「Art（藝術）」的東西給她，因為二人的緣分也是由Art開始，她笑說：「當年我喺英國讀書，老公想追我，就話有個project要搞，叫我帶佢去美術館參觀，（咁係『呃』唔係art喎？）係囉，真係呃呀。」她表示老公每年生日都會送她最愛的藝術家作品，但在她心目中，最珍貴的還是囡囡的小畫作。
採訪：名人組