張兆輝儲足彈藥床戰娥姐
張兆輝與商天娥在處境喜劇中首度演夫妻，且不乏床上戲，輝哥笑言儲埋多年的彈藥，一次過拎晒出來。
睽違公仔箱多年的張兆輝，最近與商天娥在處境喜劇《結‧分@謊情式》飾演夫妻，雖然入行n年，但二人竟是首次演對手戲，難怪輝哥大讚火花十足：「我哋儲埋咁多年嘅『彈藥』，依家咪一次過拎出嚟用囉！（相逢恨晚？）唔會，我哋仲咁年輕！」既然一夜夫妻，當然少不免「床上戲」，輝哥大呻着睡衣難頂：「你估拍『床上戲』好爽呀？啲睡衣咁薄、個廠又凍、被鋪又有塵，哈哈！」
似碌木 冇飛來蜢
問到現實生活中有否「飛來蜢」？輝哥笑說：「黐我呢啲木頭冇用o架！黐監製同導演好過啦！（傳你有幾千萬身家喎！）我好孤寒o架！」並指太太亦不曾擔心他出軌。至於同樣擁有「生意佬」老公的娥姐，亦撐老公是快樂老實人。不過，他們異口同聲拗撬在所難免，輝哥只望不要小事化大：「我一早已經明言唔可以成日將『離婚』掛喺嘴邊，費事講咗收唔番。」
面對一眾新演員，娥姐與輝哥認為是對耐性的考驗，但不介意與無綫共度時艱：「台前幕後都多新人，NG梗有o架喇！惟有自己就吓！」
輝哥坦言娘家已多次召他回巢拍劇，令他不好意思再推：「啲仔女又話想睇我上電視，時間又夾到咪拍囉！」
酬勞高 仍拒北上
娥姐則指北上拍劇雖然酬勞甚豐，但對黑心食品不敢恭維：「工作除咗睇人工，仲要講享受。（傳TVB刻薄？）食得鹹魚抵得渴，睇你要咩囉！」
文：阿彭 攝：林蔚恩