馮允謙聖誕「音」謀俘虜粉絲心
「巨聲3幫」亞軍馮允謙（Jay）因大受觀眾歡迎，成為比賽中的風頭躉，並已簽約做歌手。聖誕節就到，他許願明年能夠出碟，用他的音樂俘虜更多歌迷的心。
在加拿大成長的Jay為實現音樂理想，畢業後返港參與《超級巨聲》比賽，一直深受評判一致好評，網絡人氣由頭帶到尾，可惜最終輸畀身為教師的廖仲謙，他表示：「其實係諗唔到可以行到呢個地步，好開心，參加比賽係因為我鍾意音樂，係咪冠軍真係唔重要！」Jay雖然屈居亞軍，但憑其俊朗的外貌及穩定的聲線，已經吸納不少歌迷，成功跟無綫簽約做歌手，希望打造新一代偶像實力派。
學好中文雙語發功
Jay表示父母因工作而經常分隔異地，近來媽咪跟孖生細佬因為支持他比賽而返港，令家人見面的機會變得更多。對於簽約做歌手，他說：「真係好希望可以出一張屬於自己嘅專輯，特別係自己鍾意作曲，好想大家都支持我嘅音樂，呢個係我嘅聖誕願望！」Jay表示返港後努力學中文，希望中、英文歌曲都可以發揮。
「花」招氹女不可輕用
提到聖誕節，Jay表示加拿大的聖誕好凍，不過氣氛都會好開心熱鬧，他每年都會為屋企人準備每人一份聖誕禮物，爸爸曾經送他一對夢寐以求的「Air Jordan18」的波鞋，令鍾愛籃球的他開心不已，問到會否送女友禮物？他說：「曾經試過喺學校準備玫瑰花同小禮物，仲彈結他唱咗一首歌送畀個女仔，（溝女絕招？）哈哈，都幾work呀，不過唔可以個個都用呢招！」
場地：鑽石山荷里活廣場
採訪：卓藍