莊思敏覺逼人關注 阿佘證Ron冇去派對
模特兒莊思敏對於內地女星張馨予，在吳卓羲（Ron）微博上載床照一事，莊思敏昨日在港出席活動時指「好有趣」。問到是否有人刻意安排，她說：「未必啩？開錯人哋戶口啫！我覺得如果咁公開係想好朋友關注多啲自己，有逼嘅成分囉。（對男方有壓力？）唔知佢哋咩關係。（吳卓羲多次遭出賣？）好難咁講。（女仔手法問題？）不願置評，我唔識個女仔。但最緊要如果個男仔覺得咁樣交往係開心就OK啦。」
另外，有傳張馨予發功是因Ron出席完梁靖琪婚宴後，與前緋聞女友佘詩曼去after party，佘詩曼說：「我證明佢都冇去after party。但係好奇怪，自己微博密碼點解畀人，我對科技好低B，但微博係私人嘢，我唔會畀密碼人，真正來龍去脈我唔知，不便多發言。」
