嘉穎連踩2晚飄飄然炒車
連踩兩晚盛會的出爐視帝鄭嘉穎，昨晨駕駛寶馬回電視城拍劇途中，不慎撞向石壆，車身輕微刮花，但時來運到的他並沒受傷，下午已繼續拍劇。至於失落視帝的天華前晚與嘉穎出席婚宴時大方合照，更搞笑謂：「死仔，攞晒啲獎唔留畀我！」
三料視帝鄭嘉穎繼大前晚通宵慶功後，前晚再出席梁靖琪婚宴玩餐飽。未知是否high過頭，昨晨他駕駛價值八十萬元的寶馬X6往電視城途中，在環保大道附近撞壆，刮花右邊車身，猶幸鴻運當頭的他毫髮未傷。
酒精測試冇超標
其後警員到場，為嘉穎進行酒精呼氣測試，結果亦沒有超標。雖然未能拍攝第一場戲份，但向來專業的嘉穎下午已到尖東會合胡杏兒等，繼續拍攝《怒火街頭Ⅱ》，並在微博上載一碗麵相，安撫粉絲。
事後嘉穎接受電話訪問時感謝大家關心：「少少碰撞啫，部車都救得番。你見我仲開到工、食到麵就知冇事啦！」對於有報道指他以千萬劇酬接拍內地劇集，他說：「邊有咁多錢！（同天華合作尷尬？）點會？大家係好朋友。」他又稱兩人從未合作過無綫劇集，故相當期待。
再奪「亞洲視帝」
雖然因車禍受驚，但仍無損嘉穎的事業運，他今晨已啟程往新加坡出席《第十六屆亞洲區電視大獎2011》，據知他會憑《怒火街頭》榮膺「亞洲視帝」，「舊愛」佘詩曼則憑《公主嫁到》封后，非常有緣。
此外，嘉穎與天華前晚在婚宴上齊齊玩新娘，期間苗僑偉（三哥）叫一眾小生上台玩「摸patpat認老公」遊戲，率先上台的天華即「劉以達上身」：「鄭嘉銳（鄭嘉穎）上台啦！」三哥即笑說：「爭視帝嘅人自己上台搞掂佢！」其後嘉穎與天華大方合照，天華再搞爛gag：「死仔，攞晒啲獎唔留畀我！」隨即強調自己如laughing哥般打不死，明年會再接再厲。文：影視組