Toby喊包新娘老公嗌執到
梁靖琪（Toby）前晚出嫁，感動及搞笑位不盡，新郎除了高歌獻技外，又大讚Toby是80後難得的傳統女性，令新娘子Toby變喊包全晚狂喊！
無綫高層梁家樹寶貝女梁靖琪前晚下嫁圈外男友黃敏豪（Aaron），場面比台慶夜更星光熠熠，司儀王祖藍與阮兆祥笑言猶如舉行頒獎禮，新人是男女主角得獎者，現場似足圈中人敍舊，導致一對新人進場及致辭時，賓客仍繼續傾偈及影相。
冧歌氹老婆
喊包新娘子Toby全晚不停拭淚，每逢家長及新郎上台便大喊，新郎Aaron發表愛的宣言，狂讚Toby是80後難得的百分百中國傳統女性，更大叫「我執到」，又特別感謝Toby已過身的爺爺，令Toby再度落淚，她表示經歷生離死別，一家人更為團結。其後Aaron高歌氹番Toby，其歌藝獲大讚，陳百祥笑言比張學友及譚詠麟更佳，原來Aaron於婚前兩日偷偷錄製新歌，但只表示是跟姐夫傾偈，一度令Toby不滿，前晚Toby得知鬧錯老公後又變喊包。
梁家樹與老婆蕭笑鳴（巴姐）同以踢死兔裝扮型look示人，當梁家樹上台致辭時已High爆半醉，並大搞爛Gag：「我屋企有四間房好熱鬧，但依家兩個女嫁晒，吉咗兩間房，得番兩隻戇狗，其中一隻仲係閹咗嘅西施！」全場爆笑！
婚宴上亦不失搞笑位，姊妹湯盈盈被要求摸Pat搵男友錢嘉樂，更笑言嘉樂的屁股似足女人，其後轉玩新郎，要他憑女士玉腿找出Toby，阮兆祥更搞笑伸腳扮女士！另外，一對新人送上印有兩人名字的頸巾及朱古力作回禮。
落Club狂歡
宴會後眾人拉大隊往中環Fly Club繼續狂歡，佘詩曼、湯盈盈、苗僑偉及戚美珍等均有出席，至凌晨二時賓客陸續離開，一對新人玩至三時許才盡興而回，Toby拖實老公在鄧穎芝陪同下坐的士返歸。
文：影視組