G.E.M.奉旨出碟跟騷留影

G.E.M.今年5月在紅館處女開騷,DVD快將推出,她自言最開心的莫過於在騷內翻唱已故國際巨星米高積遜(MJ)的作品,獲其唱片公司讚好,並批准收錄在DVD內,令事件變得完美。

G.E.M.自5月入紅館開處女騷後,將於11月尾推出演唱會DVD,她說:「呢隻碟係我今年唯一產品,但自己覺得好滿意,DVD用咗半年時間籌備,自己有入剪接室睇,見到佢哋好仔細,每首歌當MV剪,連舞蹈員、樂手都有多個角度。」問有冇畫面想刪掉或保留?她笑說:「跳舞核突咪剪咗去,但一定要保留我講嘢位。」

翻睇個唱 喊足5次

當日G.E.M.翻看DVD時,竟感觸到喊了5次,她說:「睇番自己唱《Get Over You》時,諗番之前好努力好畀心機做呢個騷,覺得好感動,另外彈鋼琴講心聲、完騷時全部人企起身,感到依依不捨,所以喊咗咁多次,其實自己幾易喊,完全畀情緒主導。」

除了喪喊外,G.E.M.最開心是在個唱上翻唱MJ歌曲《Wanna Be Staring Something》,獲其唱片公司批准版權收錄在DVD中,她高興說:「通常MJ歌好難攞版權,問咗好耐一直唔覆,冇法下send演唱會片段畀佢哋睇,點知過兩日回覆話覺得我表現幾好,畀咗版權我哋,真係好開心好有成功感。」

預售萬隻 完全O嘴

整年沒出碟的G.E.M.,這張DVD首批定單有過萬張,成績令她鼓舞:「自己幾意外,之前新專輯預售都係7、8000隻,呢隻有1萬銷量,完全O嘴,我覺得個唱好完美,自己同工作人員都畀咗200%心機,依家好滿足,覺得好驕傲。」

採訪:音樂組

攝影:黃叔榮