盧凱彤呻寂寞 恨要轟動愛情

「結他女神」盧凱彤(Rockmui)長期在外地工作,單身多時的她承認感到很寂寞,大時大節更感孤獨,所以Rockmui呼籲追求者行動要快。她希望談一場有「五湖四海」、「驚濤駭浪」感覺的戀愛,認真誇張!

創作結他歌手盧凱彤近日推出新聖誕歌《一個人回家》,問為何創作這麼傷感的歌曲?Rockmui可憐地說:「我有一次做完嘢自己搭車返屋企,途中自己反省過去,突如其來覺得我一個人飛來飛去做嘢好寂寞,所以就作咗呢首歌抒發。(咁慘?)所以如果我拍拖的話,對方都要唔介意我飛來飛去。(網上傳情?)我唔得呢啲,我一拍拖就要全情投入!」

不喜男友迷失自我

問現在可有追求者?Rockmui說:「未有明顯嘅,希望明顯啲,如果要追就唔該快啲!我好想有一種五湖四海、驚濤駭浪feel嘅戀愛!(世界各地都有一個?)哈,咁咪唔使住酒店?都幾好,唔使負擔。不過我自問做唔出,拍拖始終喺自己身邊最好,如果唔喺自己身邊會好似身處地獄。」

Rockmui又指將來男友除了要痛錫她,亦一定要看她所有演唱會。她說:「佢可以睇完話唔鍾意,不過一定要睇。佢仲要所有我嘅歌都識唱,要所有詞都識背。(搵fans做男友?)唔得,因為唔可以對方太沉迷我,冇咗自己。」

配合新歌下月開騷

另外,Rockmui為了配合新歌,將於十二月底在九展舉行兩場音樂會,主題是孤單一個人過的聖誕節。

文:王羽飛 攝:吳文聰