YoYo凸肚擺酒 王浩信射歪賴巨峰
王浩信（Vincent）與陳自瑤（YoYo）前日「8條1」註冊後，昨日於酒店設宴款待親朋，獲一眾圈中人撐場。被傳有喜的YoYo昨繼續「谷奶」兼凸肚，但Vincent力撐「冇餡」更笑言太太上圍勁，當被問到可有請緋聞女友莊思明飲時，Vincent即緊張失措；看來Vincent於小登科還要為女「忙」，認真有苦自知。
一對新人昨假港島香格里拉酒店筵開22席喜宴，由梁靖琪做婚禮搞手，並與C君兼任婚宴司儀。婚宴現場以純白布置為主，並添上蝴蝶蘭和蕙蘭兩種花，台上更以二人洋名字頭的Y及V來砌成了W字樣，寓意屬於他倆的婚禮，甚具心思。
早上的接新娘環節，由「戥穿石」陸永、C君、羅仲謙、黃長興等跟圈外人姊妹團「大戰」，Vincent說：「食咗內有苦瓜、榴槤、芥辣、辣椒粉和檸檬汁嘅蛋糕搞到班兄弟嘔！（對老婆有咩承諾？）理財方面我會盡量畀太太打理，以後時間都會盡量錫佢，希望快啲有小朋友！（幾錢開門利是？）五位數字啦！」
獲贊助千萬元首飾
接過新娘後，一對新人下午4時半在5層高的結婚蛋糕前拍照並親吻，冧爆的YoYo以白色小拖尾的Tube Dress婚紗現身，胸前「谷奶」並凸出小肚，孕味甚濃。問可會藉機會公布喜訊？Vincent卻力撐YoYo未有身孕：「佢上面就凸！不過我哋努力中，不設防，緣分嚟就會要！」旁邊的YoYo則推說是婚紗很多皺褶位所致：「呢件古典風嘅婚紗我搵咗成個月，（首飾？）共8位數字贊助，但一對重手嘅龍鳳鈪奶奶已經送咗畀我，只因今日着婚紗唔襯冇戴，（婚禮用咗幾錢？）好多贊助減輕咗我哋負擔！」
自認恩愛懶理傳言
昨晚的嘉賓包括陳法拉、胡定欣、葉翠翠、李丞責與女友劉倩婷、馬賽和苗僑偉等，問Vincent可有請緋聞女友莊思明？他即很大反應說：「點解要請佢？我有好多同事都冇請！我哋好恩愛，冇嘢影響到！」旁邊的YoYo亦幫口解圍，並稱二人原打算再到小島行婚禮兼度蜜月，惟他們要工作只好改明年成行。
文：影視組