翠翠：望來生好啲

我好鍾意小動物，依家屋企好似動物園咁，當年去英國讀書要做一份有關動物權益嘅功課，為搜集資料睇咗好多相關影片，睇到人類點樣殘殺動物、虐待動物，就算待屠宰嘅豬牛羊都要虐待一番先，覺得好難受，自此就開始食齋。

食咗八年齋之後由英國返香港，但屋企人接受唔到，所以開始食番肉。近幾年無意中上網睇片見到啲鬥牛由細畀人訓練做鬥狗，出世以嚟就只有打鬥，覺得好殘忍、好難過，又見到啲牛、雞被人虐待，於是再次產生唔想食肉嘅感覺。

跑步強身　中醫調理

以前喺英國讀書學校有專人安排素食，但近年食齋覺得營養唔夠，個人變得虛弱咗，上年成日病，臥病在床諗會唔會死，之後開始每日跑步鍛煉身體，亦有補充其他營養好似蜂王漿、維他命、水果，又睇中醫調理，慢慢連飲食都變得愈來愈健康、清淡，連豆漿、麵包都係自己整，加加埋埋食齋都有十幾年。

自我交代　堅持到底　

食齋唔係因為宗教信仰，係因為鍾意小動物而唔想食肉，對血腥好敏感，有次出Trip食咗舊油炸食物，一食落口已經覺得有肉味，可能係好耐冇食肉嘅關係，對肉味好敏感。食齋係對自己有個交代，堅持一樣嘢就要堅持到底，希望來生會好啲。（完）

後記：痛苦中成長

為專訪拍照當日葉翠翠由揀衫、試衫、擺甫士以至拍攝效果也不停向經理人、攝影師甚至時裝店員詢問意見作出改善。年少輕狂過的她曾關閉耳朵，認為自己才是正道，換來是碰得灰頭土臉。錯誤中學習未免痛苦，但卻能學習成長，多謝過往教訓，葉翠翠才修成今日的「問題少女」。

口述：葉翠翠　

筆錄：影視組