李彩華愕然嘆笑星殞落
曾與許冠英合作最後一部電影《我要做Model》的李彩華和森美，對於他的離世均感到傷感，李彩華說：「收到消息覺得好愕然，真係無諗過，好可惜，係娛樂圈嘅損失。電影中講我參加模特兒比賽，許冠英做評判。佢為人好友善無架子，開朗和樂觀。片場入面好健談，很懂得搞笑和搞氣氛，令片場變得好融洽。」
另外，電台主持人森美對事件感到可惜：「印象最深係每次睇許冠傑演唱會都聽到許冠英唱歌，佢好唱到小人物角色嘅味道。佢唱歌、做喜劇好有才華，我覺得佢好似日劇《101次求婚》個男主角，對愛情很浪漫。佢好鍾意着件背部有鷹圖案嘅牛仔背心，印象好深。」