許冠英「師徒」詭異同月同日亡

許冠英前日疑因心臟病發猝逝,詭異的是,14年前的同一日,亦是已故演員林正英當天去世,兩人曾在電影《殭屍先生》扮師徒,估不到竟同月同日死!前晚是阿英二哥許冠武揭發弟弟倒斃家中,他指當時阿英已全身硬似殭屍,疑病發辛苦得想跣落床取藥,可惜一切太遲,許冠傑對痛失兄長傷心不已!

歌神許冠傑(Sam)哥哥許冠英獨居於九龍塘寓所,前日疑心臟病發在家中失救猝逝,終年65歲,阿英入行後拍了逾30部電影,於84年跟林正英合作拍《殭屍先生》,兩人在戲中扮演師徒,「師傅」林正英於97年11月8日因肝癌病逝,估唔到14年後,「徒弟」阿英亦死於同月同日,認真邪門,有網友慨嘆兩師徒終可在天國「重聚」!對於兩人巧合同月同日死,林正英舊愛苑瓊丹回應說:「唔好問我呢啲嘢!」

去得突然未有遺願

昨早,阿英的二哥許冠武、姪兒懷欣和懷谷夫婦到富山殮房辦理認屍手續,許冠傑兒子懷欣說:「爸爸喺香港,依家未決定喪禮點搞。」問阿英是否死於心臟病?許冠武說:「9成9都係,佢去得好突然,冇乜遺願,平時都係唱歌拍戲。」他透露阿英女友亦已知噩耗,之後一行人去了許冠傑大埔寓所,商討阿英的身後事。

之後許冠武接受本報電話訪問,指弟弟遺容安詳似睡着了,並透露阿英於年多前患了心臟病,曾暈低和呼吸唔到,要裝心臟起搏器和服心臟藥,由於弟弟一直獨居,曾勸對方裝平安鐘,卻拖拉至今無法挽回!對於阿英在家中倒斃,許冠武細訴經過:「佢之前扭到腰骨,昨日助手本來同佢去睇醫生,但一直搵唔到佢,上門按門鐘都冇人應,助手驚有事搵咗開鎖佬,但看更阻止撬門,我嚟到同看更講性命攸關,結果撬門入去,撬開第一道門發現反鎖,個心即時一涼。」

未能及時取藥枉死

入到睡房,他發現弟弟全身冰冷倒臥床上:「佢面向枕頭,成個人趴咗一半喺床,好似好辛苦咁,我估佢想跣落床攞藥食,可惜跣到一半已經昏迷,當時佢手、腳、成個身都硬晒,好似殭屍咁,冇脈搏冇呼吸,我估佢死咗超過18粒鐘。」問家族有冇遺傳心臟病?他說:「媽媽晚年80歲先有,做咗通波仔手術,阿英未到呢個階段,只係心瓣有事。」

許冠武坦言待救護員證實死訊後,才敢致電通知Sam:「佢好難過好唔舒服,冇乜嘢講,只係話即時處理身後事。(Sam有冇喊?)我哋男人唔會喊,咁大個人要去就去,只係好突然,唯一安心係佢冇乜痛苦咁走。」許冠武謂四兄弟中,Sam和阿英感情最好,兩人常一齊做騷,他最後一次見阿英,就是今年8月許冠傑廣州演唱會,當時阿英仍身體無礙,許冠文則身在廣州,他已將噩耗告之。

至於幫許冠傑演唱會擔任監製的蕭潮順表示,Sam計劃明年4月假紅館開騷,一早預了阿英做嘉賓;高志森亦指前年幫阿英和朱咪咪搞演唱會,因反應好想開part 2,卻因檔期問題搞唔成,現因阿英離世一切成泡影。

文:音樂組

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!