梁漢文晒肌唔敢露pat
梁漢文（Edmond）明年1月28、29日舉行演唱會，昨日他出席記者會時展示六舊腹肌，連老闆龐維仁亦忍不住出手「檢查」，好兄弟陳奕迅（Eason）以神秘嘉賓身份出現，並送上與「BIG FOUR」三位成員夾錢的數十萬咪高峰，令Edmond感動地說：「咁重手呀！」抵死的Eason搞笑說：「呢支咪知你好想買，所以同幾個兄弟夾錢買畀你，你知啦，你得四個朋友。」引得全場捧腹大笑。
Edmond雖然擁有健碩身材，但不敢以T-Back示人：「屁股唔夠圓潤同平滑，騷前面……腹肌好喇。（怕唔怕歌迷將利是攝入褲頭？）由佢攝，冇所謂啦，最緊要歌迷投入同開心。」其妻林文慧則擔任個唱形象指導。
