基仔微博遭入侵電話外洩

古巨基出席活動時自爆個人微博被人「撞入」,幸好沒有被惡搞,基仔表示雖然微博中沒有任何甜蜜私訊,但相信個人電話號碼已外洩,他亦不忘呼籲歌迷給他保留私人空間。

歌手古巨基前晚出席慈善活動,與受惠的小朋友一同合照及分享心情。基仔之後更自爆日前個人微博被人撞入,他謂先前曾上載一張可見其登入名稱的相片到微博,他說:「歌迷見到之後就撞,雖然佢哋冇密碼,但因為我微博係託微博公司開,佢哋好心幫我設定提示問題做最鍾意歌曲,點知有人逐首撞,最後撞入咗!」

改密碼刪提示

基仔表示於討論區看到有歌迷討論才得知此事,之後得力助手兼緋聞女友(Lorraine)馬上聯絡微博單位,改了密碼及登入名稱,並刪除提示問題,基仔提醒大家現時微博普及,使用時亦要小心。

雖然基仔微博遭人撞入,但幸好沒有被人惡搞,問到他微博中有沒有跟Lorraine的甜蜜私訊?他笑說:「得力助手冇微博!私訊亦冇古靈精怪嘢,好放心,最私人係電話號碼,自己都有寫過自己電話畀人。」

拒接陌生電話

基仔自言不認識的電話號碼不會接聽,故雖然電話號碼外洩,亦未有造成滋擾,亦不會改電話號碼,並說:「好彩今次件事係粉絲做,唔係惡意,但鍾意還鍾意,希望保留私人空間!」

文:音樂組