羅仲謙楊怡BBQ斷正

現年廿七歲的羅仲謙與傅穎的戀情以涉嫌動粗兼劈腿而告終,期間一度爆出男方與三十二歲無綫花旦楊怡因拍劇而撻着姐弟戀,雖然兩人矢口否認拍拖,但最終被撞破趁萬聖節靜靜雞入郊野公園BBQ,男方更專誠驅車接載楊怡,關係非淺。

羅仲謙與同公司的傅穎糾纏多時,最終分手收場。今年五月,有指謙仔仍未正式甩拖之際,已暗地與年紀相差五載的楊怡合作《On Call 36小時》時成功撻着,發展姐弟戀。楊怡更不避嫌地出言力撐一度受分手事件影響形象的謙仔,但兩人一直否認拍拖,謙仔更堅稱自己從沒對楊怡管接管送,甚至沒有車過楊怡。

照顧周到

雖然言之鑿鑿地否認,但兩人終於在萬聖節被撞破神神秘秘地入郊野公園BBQ。前日傍晚五時許,謙仔獨自駕車出現將軍澳,直駛往楊怡居所。十多分鐘後,素顏楊怡登上了司機位旁。謙仔載着楊怡直駛往自己位於大埔寓所樓下,三名友人亦在此際出現,與謙仔一同上樓將大批預先準備好的食物及飲料搬上車,楊怡此時翹埋手,站在車旁負責指指點點。一場BBQ,盡顯謙仔表現相當有心,對楊怡完全照顧周到。

未幾一行五人往大美督郊野公園,避開了當晚熱鬧狂歡的巿區,但他們依然非常謹慎,挑選了一個最為偏僻的燒烤爐。期間謙仔和楊怡愈坐愈埋,不時細聲講大聲笑。及至發現記者拍照,兩人即露出尷尬之色。謙仔主動趨前說:「唔好影,費事嚇親啲朋友。(做咩嚟呢度燒嘢食?)我喺呢度附近住。」但記者指其他人住得遠,謙仔即無奈地揮手。

拒影合照

被撞破燒嘢食,謙仔和楊怡堅持不肯坐在一起合照,楊怡說:「你哋影到咪影囉!可唔可以畀啲相我睇?影得靚啲呀!要唔要一齊食呀?我燒埋畀你哋吖!」雖然表面上看似大方,但記者剛離開,楊怡已經急不及待叫朋友一齊合照,繼而放上微博,相當之煞有介事。

文、攝:追蹤組