千嬅隨時有 子高緊張似押犯
前晚劉青雲與楊千嬅偕同另一半現身時裝活動，各晒恩愛，其中千嬅大露背上陣，不過老公丁子高不介意愛妻性感，反而緊張她穿上8吋高踭鞋，因為恐防她隨時會有咗。
前晚圈中三對模範夫婦出席BOSS Black開幕，包括劉青雲與太太郭藹明（Amy）、楊千嬅與丈夫丁子高，以及新婚的混血模特兒Amanda S.與外籍丈夫Christian，同場還有模特兒姚予晴、林莉、歐陽妙芝、琦琦等，場面熱鬧。
Amy以黑色透視裙上陣，青雲則以紅色西裝到場，Amy笑言要畀對方101分。提起最近頻頻夫妻檔出席活動，青雲自嘲：「主要係因為得閒，兩個人有啲節目，反正返屋企都係瞓，又可以見吓世面。」對於電視圈的挖角潮，Amy承認曾與王維基見面，但未傾到價錢細節：「有時都有戲癮，但又怕自己唔適應，老公都好鼓勵我。（老公畀家用畀得好開心，所以唔使你出嚟拍戲？）都好開心。」問到前晚的出騷酬勞是否全數交給太太時？Amy向青雲撒嬌說：「係咪呀？老公。」青雲即時投降：「你話乜就乜啦！」大晒恩愛。
寧晒背拒獻「細」
而千嬅以薄紗透玉背上陣，並穿上8吋高踭鞋，由老公扶實到場，千嬅即時投訴：「佢抽住我胳肋底行，好似捉犯咁，好樣衰。」子高解釋：「對鞋好危險，佢行路嘅姿勢又唔正確。依家每個月都有機會有（咗），佢着對咁嘅鞋。」問到是否介意千嬅啲鞋多於露背？子高乘機大讚：「佢個背脊好靚，唔介意。前面就唔好搞。」千嬅夫唱婦隨：「前面細，費事獻『細』。」提到造人時，千嬅當眾怪責老公之前亂說話爆閨房事：「你講你自己講過乜，畀人寫到好似風月版咁，好多人問我，你老公發生乜事。」子高尷尬地說：「係有人撩我講，我只係話我好努力（造人）。」二人你一言我一語大耍花槍，非常搞笑。
另外，千嬅昨日出席友人婚禮時，盛讚子高是一等老公，自己只是二等妻子，向老公大笠高帽。
文：名人組