周秀娜幫口還傅穎清白
性感女神周秀娜（Chrissie），昨日現身遊戲機發布會時，以性感Deep V上陣。有傳因「接載傅穎事件」而與男友陷入冷戰的Chrissie，澄清二人冷戰與傅穎無關，傅穎事後亦感激Chrissie還她清白。
Chrissie昨日與台灣女星陳喬恩、高海寧等出席Play Station Vita香港發布會，拋胸上陣的Chrissie搶盡風頭。最近與男友冷戰的Chrissie，當被問到會否送遊戲機給男友時，就冷淡說：「冇諗過，但會送畀細佬。（你兩個好番未？）拍拖都係咁，有熱戀期、冷靜期，我哋依家係平淡期。」Chrissie又透露將到內地拍劇兩個月，問到會否擔心離港兩個月感情更淡？Chrissie坦言：「係啦，都要搵啲激情，或者走時搵佢食麻辣火鍋。（擔心呢兩個月佢會接載第二個女仔？）所以咪話佢好忙，冇時間打機囉。」
不過，Chrissie前晚現身另一活動時，就澄清二人冷戰與傅穎絕無關係，她解釋說：「不嬲唔關傅穎事，唔知點解新聞扯落佢度。」話雖如此，Chrissie卻坦言會好好利用北上拍劇的時間冷靜下。
傅穎祝和好
事後致電傅穎，當獲悉Chrissie為她澄清時，她在電話中表示：「係呀？多謝佢幫我澄清，講番事實出嚟，其實前幾日佢已經私下有打電話同whatsapp講唔好意思，雖然大家都做呢行明白係咩一回事，但依家佢講出嚟還我清白當然開心，都希望佢同男朋友快啲冇事。」
文：名人組