拉姑60歲牛一 轉玩低調
拉姑狄波拉快將60歲生日，昨晚在中環跟好友搞派對預先慶祝，去年於同一地點搞生日，愛子謝霆鋒及張栢芝一家四口拉大隊到賀，可惜二人離婚後今非昔比，拉姑選擇低調度過。
拉姑將於本月27日度過60歲大壽，昨晚在中環Isola餐廳的海景位置宴請一眾好友歡度大日子，老公鬍鬚Kong、陳國強、查小欣、顧紀筠夫婦、陳自強、時裝設計師楊遠振等盛裝到賀，但身在香港的霆鋒則一直未見人影。
風騷滿場飛
女主角拉姑以黑色閃片衫、金色長褲及大蝴蝶結中性打扮示人，心情大靚的她風騷滿場飛，不時跟賓客碰杯飲酒，又貼頭合照留念，場內四圍枱的賓客都盡興而歸，場面非常熱鬧。
去年10月拉姑同樣包下Isola餐廳搞生日，當晚霆鋒、栢芝帶埋一對囝囝溫馨到賀，可惜囝囝新抱協議離婚後，拉姑未能跟孫仔享盡天倫。
為電影錄音
霆鋒前日由上海返港，準備為母親慶祝60歲大壽，返港後他已急不及待探望一對愛子，而他昨日如常到柴灣為電影錄音，而今早將出發到合肥出席金雞百花獎頒獎禮，相信將會待拉姑27日生日正日才為母親大事慶祝。
另外，下周結婚的李玟在餐廳附近現身，她戴住黑超不停講電話，未知是否為婚禮周張，見到記者影相都報以微笑，待嫁心情非常不錯。
採訪：音樂組