莊思敏轉軚 林忠豪緊張箍煲
莊思敏自從與吳浩康分手後，迅即成為城中搶手貨。早前她與廖碧兒舊愛林忠豪撐枱腳而傳出緋聞，但昨日莊思敏出席活動時透露與男方已少聯絡，暗示關係有變。林忠豪聞言後，即大為緊張，更代莊思敏澄清所指的人並非是他！
莊思敏與林忠豪上月底約會撐枱腳而傳出緋聞，事後兩人不避嫌隔空互讚，莊思敏讚男方細心有內涵，林忠豪又讚女方性格爽直，令緋聞甚囂塵上。不過昨日莊思敏與「Canon女」Melanie Z.出席「十月啤酒」活動時，她坦言已少聯絡林忠豪：「呢排少同佢飲酒，同佢少聯絡。（你唔畀機會林生？）忙嘛，成日揸車唔可以飲酒。同佢冇進展，停咗落嚟，冇刻意諗，又唔趕住拍拖，睇定啲先啦！可能做朋友仲開心啲呢！」
怕男方傷心
問到擔不擔心林忠豪返回廖碧兒身邊？莊思敏竟說：「隨便！係你就係你，緣分控制唔到，緣分兜兜轉轉。（你咁講怕唔怕佢傷心？）盡量唔好畀佢聽到。」她又指舊愛吳浩康因多在大陸工作，亦與對方少聯絡。近日瘋狂愛玩App Line的莊思敏表示因擔心收費問題，剛剛刪掉。
事後記者致電林忠豪，他得悉莊思敏言論後大表緊張，掛電後再回覆記者，他說：「我啱啱同莊思敏聯絡過，要代佢澄清，佢係聽錯咗以為講緊第二個人。」莊思敏的一番說話，無端端令林忠豪白緊張一場。
文：名人組