陳豪拖女友開工聞床照面紅
愈愛愈甜蜜的陳豪及陳茵媺，昨日拍拖出席活動，陳豪直言想和女友的父母會面。近日有疑似Jessica C.床照流出，問到會否和女友拍「親密照」，陳豪即時面紅耳熱連聲叫：「啋！」
陳豪和陳茵媺昨日以情侶檔姿態出席馬場活動，齊齊搵銀的雙陳，手翹手猶如一對新人，恩愛甜蜜，陳豪更細心不時提點女友要照顧鏡頭，同場還有莊思敏、陳嘉桓及鄭嘉穎前緋聞女友徐靖雯等。
錄影廠一角短聚
陳豪笑言與女友陳茵媺近日各自忙於工作而少見，現在可以拍拖兼搵錢，更自爆曾趁空檔自備曲奇餅及咖啡到錄影廠一角和女友小聚。
陳茵媺被問到會否帶陳豪會見父母？在旁的陳豪即搶答道：「我都想見吓佢哋！」陳茵媺說父母現身在加拿大，並得知其戀情。「父母唔會畀咩comments，因為我係比較獨立！」陳豪此時即說：「都係見咗面先comment啦，我都好想meet吓佢哋！（你好心急想見？）見係好正常，係禮貌，等佢哋下次返嚟，請佢哋食飯同沖咖啡畀佢飲，係我嘅榮幸！」
保守唔敢拖手
對於有人兜售疑似警鐘胸Jessica C.床照，陳豪說賣相猶如荷里活的作風，不過問到會否和女友拍「親密照」？陳豪即面紅耳赤急急的說：「啋！我哋好保守，冇呢啲觀念！我哋係好公開好正常交往，保守到手仔都唔敢拖。」
被問到有否影咀嘴相？陳豪說：「唔好成日問啲咁敏感問題，畀啲空間啦！」而陳茵媺則說以前未被要求拍床照：「都係影啲正常嘅相，例如特別時節先影，我好乖。」
採訪：名人組