苟芸慧何傲兒王君馨共同進蛻
苟芸慧、王君馨與何傲兒同是選美出身的靚女，三人看似鬼妹仔性格，但處身複雜多變的娛圈，要適應絕不容易。縱使工作上遇到壓力，她們都懂得自我調節情緒，努力蛻變，令三位年紀輕輕的小妮子加速成長，思想愈趨成熟。
「苟」而久之 習慣性感
唔少人都覺得我已入行一段日子，其實自○九年參選國際中華小姐，只係短短兩年時間，雖然過程辛苦，但好充實。由多倫多返港發展，起初好多嘢都唔習慣，香港節奏太急速喇！工作人員成日同我講：「唔好急、唔使趕，但最緊要快！」初時我真係好唔慣，後嚟明白好多嘢都要時間適應。坦白講，直至依家我未曾喺工作上喊過，反而試過掛住家人而喊。其實壓力係自己畀自己，我唔想情緒唔好，咁樣連身邊嘅人都會受影響！
「冇以前咁天真」
兩年嚟，我改變咗唔少，冇以前咁天真。之前我同人講嘢好直，原來香港唔可以用呢個溝通方法。好彩我喺呢個圈都識到唔少傾到心事嘅朋友，好似李亞男、鍾嘉欣。李亞男係一個好好嘅聆聽者，她好守得秘密。鍾嘉欣就好直，不過我知佢係為我好。
好多人留意我嘅身材，初時真係好唔舒服，好怕醜，但慢慢覺得咁樣都係突出優點。依家我已習慣着tube dress、低胸衫，如果工作合理需要性感，我唔介意。同埋經常被人話我肥，唔開心一定有，但人哋講嘅又係事實喎！自己只好努力補救，希望可以將身體調理好啲。呢一行個個都睇外表先，我明白嘅。
「傲」氣本能 不哭人前
我拍劇經驗尚淺，最近都獻出咗多個第一次，包括第一次拍古裝劇《紫禁驚雷》，我要演繹一個打得嘅女仔，所以拍攝前都去楊盼盼嗰度惡補幾堂耍劍。另外就係我喺《誰家灶頭無煙火》獻出螢幕初吻畀Jason（陳智燊），而且唔係蜻蜓點水式錫法，因為大家都冇經驗，所以都拍咗十個take。好多朋友問我會唔會同拍檔戲假情真，其實大家都好專業，拍攝時當然愛大家，但我拍完呢啲場口會同拍檔保持距離，驚自己抽離唔到。
「唔想做花瓶」
由於我係新人，一定有壓力。試過要拍一場喊戲，事前雖然已培養感情，但最後竟然喊唔出，嗰種感覺原來好唔開心！返屋企後，我先忍唔住喊咗出嚟。嗰次喊係嬲自己，不過我選擇唔同屋企人講，唔想佢哋見到我呢一面。
選港姐至今已入行三年，我覺得自己急速成長，雖然選美出身，但我真係唔想做花瓶。呢一行冇實力遲早都倒退，所以我有學戲、學唱歌增值。諗番起選美時傳媒焦點放喺我屋企人，報道誇大話我屋企好富有，但其實只係小康之家。好彩家人好支持我喺呢行發展，令我可專心工作。縱使依家廿二歲，但我覺得自己比以前更加成熟、主動同埋健談。
「馨」而易舉 愛上拍檔
入行三年，好幸運有機會參與好多劇集，演繹唔同角色，亦因為《舞動奇跡》令更多人認識我。眾所周知我性格鬼妹仔，自小喺紐約居住，廣東話講得唔太好，每次演戲講對白，我都不禁有好多表情。拍劇時顧對白又要顧表情，一時拿捏唔到，就演得唔夠自然。我試過好失落，畀自己好大壓力，亦因太過用力說話，額頭同嘴邊留下唔少坑紋。老實講，曾經有美容醫生建議我打botox，但我唔想，因我知如果真係打咗，之後一定要成日打，我唔想五年後面部硬繃繃！
「有少少抑鬱」
之前拍《紫禁驚雷》，我要飾演一名奸妃，不斷害人。拍時太投入，引致有少少抑鬱，唔明點解個角色要咁樣害人？之後有唔少前輩教我要麻醉自己「呢個奸人就係我」。講真，嗰時我性格完全同真實相反。以前有的士司機兜路，我會唔出聲，但嗰時有司機兜路，我忍唔住出口鬧佢，事後我同自己講一定要抽離角色！
其實我好希望拍感情戲，拍咗好多劇，都未試過同對手有感情線。過往我只談過一次戀愛，所以希望透過角色再嘗拍拖滋味。問我怕唔怕愛上對手？哈哈，未知喎！反而我試過跳舞時愛上舞伴，特別跳拉丁舞，因為對方好照顧我，我亦好信任佢，有一刻幻想將整個人交畀對方。
女人愛美 不抗拒整容
愛美是人的天性，王君馨、苟芸慧及何傲兒都是選美出身，三女對於自己外貌都非常滿意。現時不少女星都被指整容，她們對此都有不同看法。王君馨坦言不介意別人整容，但覺得整容的人，一定要接受有後遺症，不要到頭來後悔。何傲兒亦不反對別人整容，皆因女為悅己者容，每一個人都不是十全十美，但自己仍後生，沒需要。
苟芸慧則認為藝人樣貌很重要，若為增強自信，不反對別人整容，但若為選美而整容，她就覺得有點不公平。
文：影視組 攝：劉智源、黃叔榮 場地：Hair@又一城 苟芸慧髮型：Oscar Shek@Hair 苟芸慧服裝：charcoal 王君馨髮型：Jamie@Hair 何傲兒髮型：People@Hair 化妝：Henry