BOYZ嚇破膽 型象盡毀

BOYZ早前與樂壇新人吳若希（Jinny）、鍾一憲及麥貝夷獲電台節目《有冇搞錯》邀請，提早到主題公園歡度萬聖節。

為求增加趣味性，在展開探險之旅前，主持人彭詠儀（Morle）、黃冠斌及蒙為亮（阿O）本想夾計整蠱Jinny，豈料麥貝夷自動交戲，一見「鬼怪」即發出刺耳尖叫聲，最後被嚇到拔足狂奔，更不慎跌倒，連牛仔褲也擦穿雙膝流血。麥貝夷說：「我係超驚呢啲嘢，雖然知道係假，但見到嗰啲核突樣就係頂唔順。初初接到通告知道要嚟鬼屋，第一時間諗可唔可以詐病甩底。」

張致恒細膽，竟然全程躲在彭詠儀背後「探險」。	麥貝夷（左）被嚇親，鍾一憲（中）及黃冠斌當然乘機嘲笑她。	黃冠斌（右起）、麥貝夷及鍾一憲一見「電鋸狂魔」即chok樣。

擔心驚樣被人見

平日跳跳紮的張致恒（Steven）原來膽量亦不比女生大，全程捉實Morle之餘，遇上機關時更推對方作擋箭牌。雖然被嚇到鼻哥窿冇肉，但Steven亦不忘調皮本性。當他「安全」時即搞搞震踎低扮「鬼掹腳」，關智斌（Kenny）說：「佢哋淨係識叫又行得慢，搞到後面我哋一批嘅遊客都追到上嚟，Steven即刻勁擔心個『驚樣』被人見到。唉！我哋最近花咗好多錢打造嘅全新型仔成熟形象，一次破壞晒，真係嘥錢。」

Jinny亦係得把口，不斷講「冇有怕」，但全程死扯黃冠斌及阿O。Jinny說：「咁黑梗係搵嘢掹住啦！佢兩個誇張之嘛！話我扯到佢哋件衫變形，仲要我賠！」

文：陳寶