富永愛迴轉360°親民影後
【林淑汶澳門直擊】足迹遍布巴黎及米蘭時裝周天橋的日本名模富永愛，昨日首次踏足澳門，以性感優雅的Deep V及大露背性感打扮出席活動。雖然富永愛是次「止步」未有行騷，但依然成為全場焦點，並盡顯親民友善，大擺甫士迴轉360前後任影。
日本名模富永愛昨日現身澳門新濠天地假澳門君悅酒店舉行的《新濠天地Glam Slam 2011時尚盛典》開幕表演活動，來自亞洲的七位頂級時裝設計師包括鄧達智等打造的時尚及高級訂造設計系列，由名模Rosemary、Ana R.、姚予晴及何紫綸等演繹，而周慧敏則演繹鄭兆良設計的服裝。
首次踏足澳門的富永愛，昨日以Deep V及大露背連身裙性感現身，散發優雅大方的氣質。到場時富永愛盡顯親民本色，應傳媒要求大擺甫士，轉前轉後拍照外，並和設計師鄭兆良合照。雖然富永愛是以嘉賓身份到場，未有踏足天橋一展其風采，不過難得現身當然成為全場焦點。
周慧敏玩復古
周慧敏由髮型到服裝均充滿六、七十年代的復古味道，更言因剪裁貼身，故冇做防走光措施，不過卻令人想起當年拍ＭＶ《感情的分禮》的宮廷服谷胸打扮。周慧敏說當年是一個意外，拍前因看了有關電影而和設計師商討造宮廷服，但因未有試身，在現場拍攝時才發現有逼爆效果。「當時真係唔接受，之後有歌迷拎呢張相畀我簽名，我都唔係咁想簽。」對於身材如何多年不變，她說：「我唔係好注重，最注重係健康，平時都有做運動，但冇話集中喺身材。」
對於有傳古巨基和拍拖多年的助手Lorraine早年已婚，身為好友的周慧敏說：「如果佢哋真係結婚我一定好戥佢哋開心，我識女方先，大家都係識於微時，都好期待佢哋嘅好消息。」