徐子珊型男獻殷勤撻唔着
徐子珊與吳卓羲早前傳過緋聞，不過男方早已認定內地女友張馨予；反而子珊未有着落，最近被拍得與六呎型男親密同行，但子珊否認拍拖，還對近期新聞都牽連吳卓羲而向他道歉。
徐子珊、吳卓羲、黎耀祥、張可頤、胡定欣、陳展鵬等數十位演員昨為《法證先鋒Ⅲ》宣傳，席間子珊被問到早前被拍得與六呎型男同行，還指型男細心照顧她，與前緋聞男友吳卓羲一同接受訪問的子珊說：「多謝雜誌配合到個劇宣傳，仲要咩新聞都同卓羲有關，不過近排公司都接咗唔少job，要我哋情侶檔，OK o架！」期間子珊就緋聞連累吳卓羲，而向他說了句：「sorry呀！」
「大家諗多咗！」
至於六呎型男的身份，子珊表示是其髮型師，當日因她將到馬來西亞開演唱會，對方將髮型用品送到她家，之後購物時又禮貌地幫手而已，子珊笑言：「大家諗多咗！（髮型師有冇諗多？）相信唔會，因為我哋合作咗四五年，我同啲化妝師、髮型師都係朋友，成日一齊玩。」
陳茵媺未想轉職
對於前緋聞女友有新緋聞，吳卓羲也幫口：「佢呢個髮型師我都見過，傾過偈，（你感情有着落，有冇好介紹畀子珊？）林峯啱唔啱？黃宗澤呢？」嚇得子珊嘩嘩聲，卓羲才說：「係介紹劇集搭檔畀你啫。」子珊則笑言全部合作過。
此外，陳茵媺被問到有否收過無綫給員工有關轉職時注意事項的文件，她坦言沒收過，即使收到都不會想轉職，因跟無綫有很多年合約，且在無綫很開心。
文：影視組