陳法蓉談李麗珍：一個曾經驚嘅人
陳法蓉在圈中朋友眾多，在她心中沒有敵人，即使曾出手打她的李麗珍，也只是一個曾令她吃驚的人，隨住時間過去，一切不留痕。
我圈中有好多知心好朋友，有人問我有冇敵人，真係冇喎！有啲可能合作得唔愉快，例如遲到、工作唔協調，講真，冇咩要令我覺得要憎死一個人，當年合作拍《美麗傳說》嘅李麗珍都唔係我敵人！
（按：當年拍攝期間，有演員希望吃飯前收工，但陳法蓉因有多個不同髮型要轉，未幾導演叫「放飯」，該演員即時衝進化妝間到法蓉面前，伸手就要打，還說了句「黐脷筋」，幸好法蓉的助手走來為她擋了這一巴，而在幾個工作人員進來把該演員抬走時，她仍想用腳踢法蓉，法蓉一直未有透露該演員是誰，但當日李麗珍就直認了是她）。
硬食「死貓」
不過嗰件事喺我心底曾經係一個傷痕，直到幾年後再睇到當事人嘅新聞，發覺每個人生命中有好多際遇，有成功有失意，係傷痕只係因為當時應承監製唔講，但第日有人講咗，講到我唔啱咁，覺得好似食咗隻「死貓」，之後知佢精神狀態唔好係有原因，自己都有高低起跌，幾年後已經放低咗，件事寫咗句號啦，冇再放喺心，就好似垃圾掃咗出嚟，佢唔係我敵人，只係一個曾經驚嘅人，不過之後都冇再見過佢。
口述：陳法蓉筆錄：影視組