阿佘 蔡少芬獲加薪留人
無綫大敵當前，台前幕後工作人員被嚴重挖角，加上有不少藝人炮轟不受無綫尊重，合約遲遲未傾，有指面對此形勢，六嬸方逸華已下令高層力挽人才，昨日製作資源部總監樂易玲亦坦言「六嬸話個個都要留」！據知樂易玲今次主動出擊，先向部頭合約藝人如歐陽震華、黎耀祥、蔡少芬及佘詩曼等埋手，調升他們薪酬挽人心！
王維基向無綫進行大規模挖角，驚動無綫管理層，有指六嬸已下指令要急急留人，藝員部都不如以往般怠慢，速速與藝人續約及傾約。
樂易玲昨日回電視城，她坦言會加快步伐與藝人傾約，不理誰是挖角目標、對敵挖誰，全面加薪留人！問到挽留那些藝員？她謂：「所有經理人合約的藝人其實仲有好多年約，但個個都會傾，最緊要依家公司畀咗方向我哋，要將藝人薪酬提高。（邊啲重點演員會調整薪酬？）呢個暫時都係一個想法，我會向公司提出，而包薪經理人合約的藝人向來都會因應他們的人氣及成績而作適當薪酬調整。」
嘉穎身價並非最高
提到鄭嘉穎在內地身價升了16倍，樂易玲坦言：「佢都有呢個價，但唔係最高嗰個，16萬一集唔算太高，正如李國麟講，呢行都係善於打仗，呢場仗對無綫嚟講係好事，可能啲人覺得無綫好似一艘觀光船，其實佢係一艘戰船，依家撻着番，個個都好起勁，有人搶當然值錢啦！」
已續約者仲有得加
樂易玲直言在「挖角潮」前獲續約的演員，稍後會因應各人的情況再調升薪酬，不會等約滿才傾，據知包括有歐陽震華、黎耀祥、蔡少芬及佘詩曼等，樂易玲又提議，若然藝人想在內地拍劇，又不想疏遠無綫，可以倣效佘詩曼簽無綫部頭合約。至於有指六嬸點名要留馬浚偉，她謂：「六嬸個個都要留！」而另一高層曾勵珍坦言一直都有與藝人傾合約。
此外，記者昨日致電身在大陸拍劇的鄭嘉穎，他表示非常重視下一部劇，會看重劇本，他說：「今次係一個好開始，天時、地利、人和都好重要，（等咗好多年？）我入咗行都18年嘞！唔係短日子。（你已成好多後輩目標。）多謝佢哋支持，其實多年前我喺某頒獎禮講過，只要咬實牙關，一定等到，總會有機會。」
文：影視組