諸葛為男友代言講心又講金
名模諸葛紫岐（Marie）與楊千嬅前晚出席A.T.by ATSURO TAYAMA 2011秋冬時裝騷，Marie表示中秋節在北京與家人及男友薛嘉麟度過，而之前已跟男友的家人食飯做節，問到薛家另一準新抱陳法拉是否有份？她即說：「問番佢好啲，唔方便回應佢嘅嘢。（同枱食飯冰釋前嫌？）我哋向來冇嘢。」談到婚禮，Marie稱已定於下年擺酒，將筵開80至100圍，並有幾個心水日子，婚紗照將在港取景，她更會親自設計婚紗。
另外，對於男友的公司Neway跟客人有糾紛，Marie力撐未來老公：「相信係一個誤會，做呢個行業實多人投訴。不過佢哋好專業。（做佢哋代言人？）我想，同我公司傾，可以收平少少。（仲要收錢？）心裏面支持，但錢照收。」
楊千嬅以冬裝現身，她稱曾試過為老公買衫，但被嫌棄：「試過買咗件衫佢唔鍾意，我攞嚟當one-piece着。我哋會一齊出街買衫互畀意見，但如果有藍綠兩隻色，我話綠好，佢一定揀藍。」