任達華晒潛技 蔣怡冧爆任(目及)
任達華（華仔）昨日出席活動，大顯潛水技術，即場迷倒名模蔣怡，蔣怡更半開玩笑表示，若天體營中的男士個個好像華仔般，就不介意裸露任(目及)。
昨日任達華以歐米茄名人大使身份，出席在深灣遊艇俱樂部舉行的全新海馬Planet Ocean系列全球發布會，熱愛水上運動的華仔，穿上潛水衣即場示範潛水，在池底尋找一枚鑰匙，然後交由打扮成性感美人魚的模特兒打開寶箱，再取出最新專業潛水錶。
囑妻女要綁實泳衣
提到潛水，任達華興致勃勃，自爆大約八、九年前，曾經與愛妻琦琦在關島附近小島裸泳，提出裸泳主意的琦琦，更被浪沖走上截比堅尼，華仔說：「我即刻游出去搵泳衣，搵咗20分鐘，呢個時候好多魚仔游來睇我老婆，蝕底晒，我都有叫老婆和囡囡，以後游水一定要綁實件泳衣，以免走光，蝕底晒畀啲魚。」而華仔則睇好《桃姐》奪金像獎，自言自己和張家輝也有機會。
中門大開險勝三模
同場一眾模特兒在場互鬥性感，蔣怡一個打三個，以一襲中門大開的性感晚裝，稍稍險勝穿比堅尼但加披外衣的混血女模Ana R.、Jocelyn和Alice B.。蔣怡說好想跟華仔一同落水玩潛水散熱，又大讚與華仔合作感覺好正，問到會否到天體營體驗？她說：「如果裏面啲人好似模特兒咁，好似華哥咁就唔介意，唔係就會戴住眼鏡，費事見到唔應該見到嘅嘢。」她表示亦曾經試過裸泳，感覺自己十足一條魚，自由自在，連思想也解放了。
文：名人組