2歲蝦餃仔準備做業主
陳慧琳（Kelly）身為圈中富婆，但仍擔心家財追不及瘋狂飆升的樓市，正所謂「養兒100歲長憂99」，為保障愛兒「蝦餃仔」將來無憂生活，早年除幫他儲金條保值外，更打算為現時只得2歲的囝囝儲定錢買樓做業主！
Kelly昨日以盛裝出席銀行活動，成為擁有八百萬港幣或以上資產才合乎開戶資格的星級客戶，問她現時身家可逾八百萬？她反問：「cash呀？我冇計喎，（係咪多到計唔到？）我唔知（數字），知咗會好驚囉，因為會好緊張。」
賺蝕打個和
Kelly自言不善理財，由20多歲入行至今，全交由爸爸管錢，只聞有作各項投資，包括股票、基金、債券及樓宇賣買等，最近股市大跌，其父親向她透露之前的股票盈利和今年的虧蝕打個和，她覺得只要不用蝕錢已感萬幸。
而最慘痛的投資失利，就是97年買樓蝕了１至２百萬，有謂此數字對她來說好濕碎？她緊張地說：「梗唔係，全部都係血汗錢，賺到１、２萬都開心！呢啲（投資所賺）係不勞而獲嘅錢，唔好要求咁多。」
談及愛兒蝦餃仔的利是錢，Kelly說：「放晒喺夾萬。唔見咗嘅話我擔當唔起，我都有幫佢儲金條同金飾，但我冇計過有幾多條，依家啲金價升咗好多。」她坦言為免囝囝將來為買樓而煩，現會認真考慮幫囝囝儲錢買樓：「去到佢嗰個年代，真係乜都買唔到，所以都要諗諗幫佢買樓，儲定老婆本。」不過現時尚未是入市良機，而保值的樓宇是其心水選擇。
問她最成功的投資是否嫁個好老公？她甜笑說：「都係o架，我同老公財政獨立，佢管財政叻過我，但佢有畀家用，我啲錢就係我，佢畀晒啲錢我，我就會買晒嘢。」採訪：音樂組