黃宗澤不避嫌力撐杏兒攞視后

無綫高層樂易玲大談今年視后之爭，有指陳志雲捧法拉當一姐，故今年台慶攞硬視后，樂小姐表示公司捧花旦「一級級上」，不諱言法拉近期有阿姐風範，若然能夠拿視后當然開心，但卻否認已內定視后。而Bosco面對被踢爆力撐女友，笑言無論如何都要支持，問到睇好法拉還是杏兒，他謂：「私下我撐杏兒，好想佢攞，坦白講佢好努力。」Bosco更指有觀看女友出席威尼斯影展片段，略嫌其紅地氈晚裝未夠性感，問到對方有否買手信給他，Bosco抵死地謂：「有買紅酒畀我，孤寒鬼，嗰邊咁多皮具又唔買。」至於子珊對於收視最高點落於她喊住睇「跛Co」遺信的一幕表現高興，談到視后心水，子珊透露睇好老友杏兒。

此外，杏兒昨日接受查小欣電台訪問，談及今次威尼斯之行，她表示時間有限，未有買手信給Bosco，不過Bosco卻於另一場合指收到紅酒一支，似乎兩人口供有所出入。

樂易玲（左）否認內定視后，子珊亦睇好杏兒攞獎。

胡杏兒威尼斯行紅地氈，Bosco嫌她未夠性感。