陳奕迅標準身形任吊唔嬲
陳奕迅（Eason）、郭富城、林海峰、楊汀叮等前晚出席電影《全球熱戀》首映，Eason自認體重標準，完全不擔心拍吊威吔戲。他說：「依家科技好先進，吊威吔唔係淨係吊住兩點，有幾個位。以我嘅體重應該唔會斷，洪金寶大哥都冇事啦！不過如果好吊，桂綸鎂同Angelababy就好易，佢哋咁瘦，但我呢啲先係標準，公認o架啦！」
另外，提到陳志雲有可能要面對上訴，Eason坦言公事上不太清楚。問他覺不覺志雲有助解決四大唱片糾紛？他說：「總之陳生係我朋友，我只會關心佢嘅狀態同健康。希望佢冇事啦，其他嘢都唔重要。」