Tom搞出人命急娶陽光妹

樂隊Mr.隊中23歲的鼓手Tom（杜志烜）跟「陽光妹」何思諺（Leanne）拍拖僅僅兩個月，昨日二人突然發表聯婚聲明，宣布火速結婚，更自爆20歲的Leanne懷孕做未婚媽媽，雖然工作急嗌停，Leanne仍表示：「好開心，好驚喜！」

Tom跟Leanne上月被本報踢爆齊齊同遊日本後，二人焗住承認拍拖一個月，當時Tom被問到是否同住一房時，耍手兼擰頭不肯承認，但不認不認還須認，Tom昨日透過公司發表「聯婚聲明」，宣布結婚之餘，更自爆拍拖僅僅兩個月的女友Leanne「有餡」，未知腹中寶寶是否「日本製造」？聲明中，Tom及Leanne宣布「我們結婚了！本人杜志烜、何思諺宣布將共同踏入人生另一階段，並且更將為人父母，對此我們感到非常欣喜，希望與大家分享這份喜悅！」

Mr.成員Tom

完成工作安胎

聲明未有交代Leanne懷孕周數，但她上月十七日在微博自爆頭暈又標冷汗，未知是否「害喜」的情況，對於自己20歲就「奉子成婚」，Leanne表示：「好開心，好驚喜，因為可以組織自己嘅家庭，多謝家人同埋身邊嘅朋友祝福！」身為年輕模特兒的Leanne突然懷孕，經理人公司難免被打亂陣腳，發言人表示：「今次都幾突然，大家都有共識，（工作有影響？）梗係有啦，依家會做埋手頭上嘅工作，例如電台節目，之後佢會開始休息，（幾時再幫佢接Job？）等佢生完先接啦！」

而環球唱片高級副總裁黃劍濤（Duncan）表示：「站於公司立場，當然恭喜佢（Tom），就快做人爸爸，令佢更加有推動力去做好工作，（奉子成婚？）呢個年代都冇乜所謂啦！」本報特別去翻查婚姻註冊處過去三個月的紀錄，仍未見二人的申請，Duncan表示：「以我所知，佢哋搞緊註冊嘅嘢，過幾日佢會出嚟，親自向大家交代。」