祖兒肯搏肯露幾醜都制
容祖兒將會接拍黃百鳴賀歲新片《八星抱喜》，她揚言不介意性感示人或演醜女。對於有份演出的陳慧琳日薪百萬，自詡影壇「新丁」的祖兒不敢胡亂開價，笑言黃百鳴獨具慧眼趁低吸納。
祖兒昨早到電台接受訪問，但因患上感冒而遲了二十分鐘現身。有指祖兒將與陳慧琳、甄子丹及古天樂接拍黃百鳴賀歲新片《八星抱喜》，祖兒坦言：「Mani（經理人）有同我講過，但未落實。」有傳陳慧琳以日薪百萬「出山」擔大旗演出，問祖兒身價值多少？她說：「睇吓人哋覺得我值幾多囉！我係影壇新人點敢講咁多？而且又冇代表作，本來諗住今年拍完一部《Diva》會攞獎，等身價暴漲先拍其他戲，點知黃百鳴獨具慧眼，趁低吸納。」
熊黛林愛挑戰
提到黃百鳴過往的賀歲片擅長醜化女主角，問祖兒會否介意演醜女？她說：「如果要黐鬚或演包租婆都冇問題，但食煙就唔得！」為了演活角色，祖兒亦不介意性感上陣，她笑言：「性感冇問題，男主角係甄子丹同古天樂喎！（想錫邊個多啲？）咀邊個都得！」
另外，熊黛林（Lynn）昨日到澳門出席「軒尼詩X.O」活動，她承認已落實接拍《八》片，飾演一名盲人。她說：「未睇劇本，不過黃百鳴好好人，次次畀唔同嘢我嘗試，我會畀心機去做。」
文：音樂組