譚小環不言休：最緊要開心
94年度香港小姐冠軍譚小環，17年來在無綫默默耕耘，不是「親生女」的她，捱到今天終於都要面對現實，跟無綫解約說分手！回復自由身的小環重拾壯志：「我依然鍾意拍劇，冇諗過退休。」
小環將黃金歲月獻給無綫，想不到卻解約收場，難得她仍將責任歸咎於自己：「早幾個月前，我同無綫解約走，因為結婚之後，覺得自己身體差咗，可能年紀有番咁上下，捱唔到夜，而且我想多啲時間擺喺屋企，老公都叫我休息。」
感受娛圈壓縮經歷
問會否不是無綫「親生女」，才不獲舊公司重視，寧願解約求去？小環豁達說：「人之常情，自己喺無綫10幾年，有開心有唔開心，拍過鍾意嘅劇集，依家只係唔捨得一班同事，另一方面亦明白無綫嘅商業決定，擺重機會喺親生仔女身上，自己平常心面對，已經練習到做主角又好，綠葉又好，其實娛樂圈係壓縮經歷，睇到好多真實一面，依家最緊要開心。」
自嘲身材不及o靚模
性格樂觀的小環，懂得自嘲自娛尋開心，她笑說：「人到咗呢個階段，要試吓其他嘢，以前就話可以搏啲、性感啲，依家冇咁嘅能力，自己同o靚模身材冇得比，暫時做旁觀者開心啲。」
問將來有甚麼新計劃？小環說：「我唔抗拒拍劇，只要有欣賞嘅劇本同機會，我依家唔係退休，只係出面人感覺我冇嘢做，有合適嘅劇本我一定會拍，自己都想過戲癮，有做嘢先唔會out。」
採訪：音樂組 服裝：b+ab
場地：千鶴日本餐廳@都會海逸酒店