娜姐獲Avis傍實撫平創傷

周秀娜近月密密離港工作搵銀,月初拍戲整傷右腳入院的同時,其男友Avis(陳偉成)卻屢次爆出緋聞激親娜姐。Avis為負荊請罪,昨日陪同女友往中環睇醫生,全程扶實又幫手拎藥,娜姐終於心軟伏在男友肩上撒嬌!

近月不停穿梭香港、內地及馬來西亞密密做的周秀娜,本月8日拍新片《紙月亮》時不慎弄傷右腳,傷口長達四吋,之後拍落水戲更令傷口發炎,久久都未有結痂,令向來以靚腳為傲的娜姐擔心不已,遂決定提早回港睇醫生。

可能要「整容」

在周秀娜離港期間,先後跟傅穎、娜姐師妹CoCo傳緋聞的Avis,為氹回女友,昨午即負荊請罪,一時半陪同娜姐往中環診所就醫,全程扶實並加以安慰。

候診期間,向來獨立的娜姐亦小鳥依人伏在Avis肩上,當醫生為她消毒傷口時,她面露痛苦表情,雙手捉實男友,一度痛到雙眼通紅,娜姐對傷勢非常擔憂:「醫生幫我消毒,同畀抗生素我食,又教我點洗傷口,佢話如果個傷口埋得好,可以用化妝補救,埋得唔好就會有肉粒,到時可能要去美容院磨滑個傷口!」

Jeana講風涼話

被傷口嚇壞的娜姐幸獲男友全程傍實,據悉,Avis亦識做送了個印有娜姐最愛的公仔圖案樽仔給她「贖罪」,氹得女友重現歡顏!

此外,曾跟Avis傳緋聞的何佩瑜(Jeana)得知他陪娜姐睇醫生,即寸咀贈慶:「咁咪好囉,有人睇住唔使再整親!(係咪嗒Avis糖?)依家天氣熱,好少食甜嘢!」

文:專案組