莊冬昕尋愛唔揀女星
唱作歌手莊冬昕（Deal）被傳「一腳踏兩船」背舊愛鄭融追求新歡鍾欣桐（阿嬌），被冠「花心男」之名，自認對愛情專一的他強調不愛圈中女星，為怕斷米路，他覺得戀幕後人最穩陣。
Deal因多才多藝兼外表花弗，加上先後和鄭融及阿嬌傳緋聞，故予人「情場玩家」的感覺，問他是否曾和兩女拍拖？他說：「呢個問題唔想講，太私人。」再追問他為何如此避忌？他無奈謂有苦衷，皆因他「見過鬼都怕黑」，不想因緋聞而斷米路。Deal謂：「喺幾年前，有唱片公司老闆，因為我嘅緋聞，唔畀佢嘅女新人同我合作，唔搵我做唱片監製，走咗去搵我啲朋友做，仲講明唔可以用我嘅錄音室！咁樣好影響我工作，雖然只係緋聞，但真係有人信。」
做歌手怕緋聞
Deal明白不能控制新聞，故不會埋怨記者炒作他的緋聞，惟有採取不理會的態度。問他經常和女歌手合作，很易日久生情？他自言識朋友不是單看外表，覺得溝通到夠「夾」才最重要。他又自言只得3、4次拍拖經驗，暫未有「dream girl」，因現時成為歌手，為免緋聞被熱炒，他考慮另拓新路向：「我如果拍拖，唔會同女星，會追其他女仔，或者搵唱片公司同事、幕後人，甚至同記者拍拖都可以。」
Deal呻好難識女仔，因每日在studio工作十多小時，放工便回家。Deal自言不愛夜蒲，也不覺自己有女人緣，笑言：「可能我矮啦，香港啲女仔鍾意高大嘅男仔嘛。」
採訪：音樂組
服裝：CHOCOOLATE