李晉強有對象冇膽量

香港先生李晉強生得高大靚仔，又經常瞇眼傻笑，連「咪神」高海寧都「嗒糖」，雖然是自製緋聞，但外界十分受落，公司早前更安排二人以情侶檔搵銀，他說：「唔介意，當結識多個朋友，但同佢只係見過幾次面，冇攞電話號碼。」Clayton坦言一向有好多「飛來蜢」，但強調自己性格保守，他說：「我唔係成日溝女，過去只拍拖三次，全部都係中國人，外表唔係最重要，最緊要溝通得到。」Clayton又自爆有心儀對象，但由於太怕醜，至今仍未向對方表白，他無奈地說：「佢喺溫哥華，但依家打算留港發展一年，佢都未知道（鍾意佢），大家冇見面都擔心。」

停學闖娛圈

Clayton一直恨做明星，即使在加國尚有一年的Marketing課程未完成，仍毅然暫停學業來港參選香港先生，他說：「屋企人好支持，我亦唔介意着泳褲上台，因為對自己身形有信心。現階段拍劇、主持乜都想試，但係咪長留香港就要等timing決定。」由於Clayton七歲便跟家人移民加拿大，故廣東話並不靈光，在港男問答環節中更表現緊張，他說：「我唔識睇中文字，但Daddy、媽咪平時會講廣東話，所以識少少，我覺得香港人生活好急，溫哥華就好relax，各有各好，我都唔想成日咁hea，希望可以充實啲。」

李晉強參選香港先生時以泳褲示人贏盡不少掌聲。

李晉強雖然廣東話不靈光，但表情多多，注定食娛樂圈飯。

服裝：izzue　髮型及場地：Betty Mak @ Hair

文：李佩珊攝：沈健程