鍾嘉欣企硬 出騷冇壓價
鍾嘉欣、薛家燕等昨出席無綫新劇《九江十二坊》宣傳，嘉欣被問到有雜誌刊登了無綫藝人○八年出騷價目收費表，她列入二十大之中，嘉欣笑說：「開心，多謝公司畀機會，就算拍劇忙都抽時間畀我拍廣告、登台。（價錢有冇唔同？）好穩定，有升少少，不過唔會畀人壓價，因為經理人喺呢方面企得好硬。」
此外，男主角林保怡、陳錦鴻都在內地拍劇未能出席，女主角之一的薛家燕原本也要帶隊到深圳演出，但最終堅持現身：「我個學術中心最近推行德育課，將啲小朋友由『小學雞』教番成好有紀律、禮貌，遲啲我會帶佢哋去表演，但宣傳我點都會趕返嚟做。」
